Madridning «Real» klubi tarixda yillik daromadi 1,2 milliard yevrodan oshgan birinchi futbol klubiga aylanishi mumkin. Bu haqda AS nashri xabar bermoqda.

Jamoa mavsumni sovrinsiz tugatganiga qaramay, moliyaviy sohada ishonch bilan yetakchilik qilmoqda. O‘tgan mavsumda klub 1,161 milliard yevro ishlab topib rekord o‘rnatgan bo‘lsa, bu yil yangi tarixiy cho‘qqi kutilyapti.

O‘sishning asosiy sababi tijoriy daromadlar bo‘ldi. Marketing, liboslar sotuvi va homiylik kelishuvlaridan klub 594 million yevro ishlab topdi, bu oldingi ko‘rsatkichlardan 23 foizga ko‘p demakdir.

Shuningdek, yangilangan «Santyago Bernabeu» stadioni ham katta foyda keltirmoqda. Rekonstruksiyadan so‘ng arenada konsertlar va turli tijoriy tadbirlar o‘tkazilyapti. Stadiondan tushgan daromad 233 million yevroga yetdi.

Bundan tashqari, «Real» Emirates kompaniyasi bilan shartnomani 2031 yilgacha uzaytirdi va Adidas bilan yangi kelishuv ustida muzokara olib bormoqda. Klub bir mavsumda homiylardan keladigan jami tushumni 300 million yevroga yetkazishni rejalashtirgan.