Мадриднинг «Реал» клуби тарихда йиллик даромади 1,2 миллиард евродан ошган биринчи футбол клубига айланиши мумкин. Бу ҳақда AS нашри хабар бермоқда.
Жамоа мавсумни совринсиз тугатганига қарамай, молиявий соҳада ишонч билан етакчилик қилмоқда. Ўтган мавсумда клуб 1,161 миллиард евро ишлаб топиб рекорд ўрнатган бўлса, бу йил янги тарихий чўққи кутиляпти.
Ўсишнинг асосий сабаби тижорий даромадлар бўлди. Маркетинг, либослар сотуви ва ҳомийлик келишувларидан клуб 594 миллион евро ишлаб топди, бу олдинги кўрсаткичлардан 23 фоизга кўп демакдир.
Шунингдек, янгиланган «Сантьяго Бернабеу» стадиони ҳам катта фойда келтирмоқда. Реконструкциядан сўнг аренада концертлар ва турли тижорий тадбирлар ўтказиляпти. Стадиондан тушган даромад 233 миллион еврога етди.
Бундан ташқари, «Реал» Emirates компанияси билан шартномани 2031 йилгача узайтирди ва Adidas билан янги келишув устида музокара олиб бормоқда. Клуб бир мавсумда ҳомийлардан келадиган жами тушумни 300 миллион еврога етказишни режалаштирган.
