Madridning «Real» klubi yarim himoyachisi Arda Gyuler Luka Modrich bilan birga to‘p tepgan vaqtlarini yodga oldi. Yosh turk futbolchisi va xorvatiyalik faxriy 2023 yildan 2025 yilgacha jamoadosh bo‘lishgan, shundan so‘ng Modrich «Milan»ga o‘tgan edi.
«Modrich — aql bovar qilmaydigan o‘yinchi. U bilan birga o‘ynash nasib qilganidan juda xursandman. Biz futbol haqida gaplashardik va men undan ko‘p narsa o‘rgandim», — deya Gyulerning so‘zlarini keltiradi Madrid Universal.
Luka Modrich «qirollik klubi» sharafini 13 yil davomida himoya qildi. Yakunlangan mavsum 40 yoshli afsonaviy yarim himoyachi uchun oxirgisi bo‘lishi mumkin. Mish-mishlarga ko‘ra, u Jahon chempionatidan so‘ng faoliyatini yakunlash haqida jiddiy o‘ylamoqda.
