Мадриднинг «Реал» клуби ярим ҳимоячиси Арда Гюлер Лука Модрич билан бирга тўп тепган вақтларини ёдга олди. Ёш турк футболчиси ва хорватиялик фахрий 2023 йилдан 2025 йилгача жамоадош бўлишган, шундан сўнг Модрич «Милан»га ўтган эди.
«Модрич — ақл бовар қилмайдиган ўйинчи. У билан бирга ўйнаш насиб қилганидан жуда хурсандман. Биз футбол ҳақида гаплашардик ва мен ундан кўп нарса ўргандим», — дея Гюлернинг сўзларини келтиради Madrid Universal.
Лука Модрич «қироллик клуби» шарафини 13 йил давомида ҳимоя қилди. Якунланган мавсум 40 ёшли афсонавий ярим ҳимоячи учун охиргиси бўлиши мумкин. Миш-мишларга кўра, у Жаҳон чемпионатидан сўнг фаолиятини якунлаш ҳақида жиддий ўйламоқда.
