Braziliya terma jamoasi va Madridning «Real» klubi futbolchisi Vinisius Junior bo‘lajak Jahon chempionatida Argentina terma jamoasining imkoniyatlari haqida o‘z fikrlarini bildirib o‘tdi. «Albiseleste» guruh bosqichida Jazoir, Avstriya va Iordaniya terma jamoalariga qarshi bahs olib boradi.
«Men Argentinani JCH-2026 favoritlari qatoriga qo‘shaman, chunki ular amaldagi chempionlar, o‘zlariga ishonishadi va ularning safida Messi bor. Bu futbolchi doimo o‘zgacha harakat qilishga qodir – undan nima kutish kerakligini hech qachon bilmaysiz», – deya Vinisiusning so‘zlaridan iqtibos keltiradi AlbicelesteTalk.
Eslatib o‘tamiz, Argentina terma jamoasi Jahon chempionatining amaldagi g‘olibi hisoblanadi. Braziliyaliklar esa 2002 yildan buyon mundialda zafar quchishmagan.
