Бразилия терма жамоаси ва Мадриднинг «Реал» клуби футболчиси Винисиус Жуниор бўлажак Жаҳон чемпионатида Аргентина терма жамоасининг имкониятлари ҳақида ўз фикрларини билдириб ўтди. «Альбиселесте» гуруҳ босқичида Жазоир, Австрия ва Иордания терма жамоаларига қарши баҳс олиб боради.
«Мен Аргентинани ЖЧ-2026 фаворитлари қаторига қўшаман, чунки улар амалдаги чемпионлар, ўзларига ишонишади ва уларнинг сафида Месси бор. Бу футболчи доимо ўзгача ҳаракат қилишга қодир – ундан нима кутиш кераклигини ҳеч қачон билмайсиз», – дея Винисиуснинг сўзларидан иқтибос келтиради AlbicelesteTalk.
Эслатиб ўтамиз, Аргентина терма жамоаси Жаҳон чемпионатининг амалдаги ғолиби ҳисобланади. Бразилияликлар эса 2002 йилдан буён мундиалда зафар қучишмаган.
