«Manchester Yunayted» va Portugaliya terma jamoasi qanot himoyachisi Diogu Dalot Krishtianu Ronalduning 2026 yilgi Jahon chempionatidagi ishtiroki haqida o‘z fikrlari bilan o‘rtoqlashdi. Saudiyaning «An-Nasr» klubi hujumchisi bo‘lgan 41 yoshli futbolchi uchun bo‘lajak mundial faoliyatidagi oltinchisi bo‘ladi.
«Ronalduning Jahon chempionatida o‘ynashi kerakmi-yo‘qmi degan masalaga kimdir shubha bilan qarashi men uchun aql bovar qilmaydigan holat. U bizni kuchliroq qiladimi? Ha. U bilan har bir uchrashuvdan so‘ng yanada donoroq bo‘lib borasan», — deya Dalotning so‘zlarini The Players Tribune nashri keltirmoqda.
Eslatib o‘tamiz, Portugaliya terma jamoasi qur’a natijalariga ko‘ra «K» guruhidan joy olgan. Roberto Martines shogirdlari guruh bosqichida Kolumbiya, Kongo DR va O‘zbekiston terma jamoalariga qarshi maydonga tushishadi.
