Marokash terma jamoasi Jahon chempionati boshlanishiga bir haftadan kam vaqt qolganda jiddiy tarkib muammolariga duch keldi. Norvegiyaga qarshi o‘tkazilgan o‘rtoqlik uchrashuvida jamoaning bir yo‘la ikki nafar muhim futbolchisi — «Manchester Yunayted» himoyachisi Nussair Mazraui hamda «Betis» vingeri Abde Ezzalzuli jarohat oldi, deb xabar bermoqda «talkSPORT».

Mazraui o‘zida noqulaylik his qilgani sababli uchrashuvning 29-daqiqasidayoq maydonni tark etishga majbur bo‘ldi. Jarohatning qay darajada jiddiy ekanligi hozircha noma’lum. Bu o‘zgarish shunchaki ehtiyot chorasi sifatida amalga oshirilgan bo‘lishi ham istisno etilmayapti.

Yana bir xavotirli vaziyat tanaffus arafasida yuz berdi: Ezzalzuli o‘z jamoadoshi bilan to‘qnashib ketdi va bahsni davom ettira olmadi. U tanaffus paytidayoq boshqa futbolchiga almashtirildi.

Marokashliklar Jahon chempionatidagi ilk uchrashuvlarini 13 iyun kuni Braziliyaga qarshi o‘tkazishadi. Shuningdek, «C» guruhidan Shotlandiya va Gaiti terma jamoalari ham joy olgan.