Марокаш терма жамоаси Жаҳон чемпионати бошланишига бир ҳафтадан кам вақт қолганда жиддий таркиб муаммоларига дуч келди. Норвегияга қарши ўтказилган ўртоқлик учрашувида жамоанинг бир йўла икки нафар муҳим футболчиси — «Манчестер Юнайтед» ҳимоячиси Нуссаир Мазрауи ҳамда «Бетис» вингери Абде Эззалзули жароҳат олди, деб хабар бермоқда «talkSPORT».

Мазрауи ўзида ноқулайлик ҳис қилгани сабабли учрашувнинг 29-дақиқасидаёқ майдонни тарк этишга мажбур бўлди. Жароҳатнинг қай даражада жиддий эканлиги ҳозирча номаълум. Бу ўзгариш шунчаки эҳтиёт чораси сифатида амалга оширилган бўлиши ҳам истисно этилмаяпти.

Яна бир хавотирли вазият танаффус арафасида юз берди: Эззалзули ўз жамоадоши билан тўқнашиб кетди ва баҳсни давом эттира олмади. У танаффус пайтидаёқ бошқа футболчига алмаштирилди.

Марокашликлар Жаҳон чемпионатидаги илк учрашувларини 13 июнь куни Бразилияга қарши ўтказишади. Шунингдек, «C» гуруҳидан Шотландия ва Гаити терма жамоалари ҳам жой олган.