Yarim og‘ir vazn toifasida UFC reytingining o‘ninchi pog‘onasini band etib turgan o‘zbekistonlik sportchi Bogdan Guskov 1 avgust kuni Serbiya poytaxti Belgrad shahrida bo‘lib o‘tadigan UFC Fight Night 283 turnirida oktagonga ko‘tariladi. Guskovning murabbiyi Gor Azizyan Meta Fight nashriga bergan intervyusida bu ma’lumotni tasdiqlagan.

“Bogdan 1 avgust kungi Serbiyadagi turnirda jang qiladi, lekin hozircha kimga qarshi ekanligini aniq bilmaymiz. Ammo UFC bizga Bogdan shu sanada u yerda bo‘lishini ma’lum qildi. Hozircha shartnoma imzolanmagan, biroq polshalik jangchining rozilik berishini kutyapmiz. Ikki hafta oldin Blaxovichning jarohatlangan oyog‘i bilan yurganini ko‘rgandim. Biz u bilan jang o‘tkazishni judayam xohlaymiz”, deydi rossiyalik mutaxassis.

Eslatib o‘tamiz, Guskov o‘zining so‘nggi jangini 2025-yilning dekabr oyida Las-Vegasdagi UFC 323 turnirida polshalik Yan Blaxovichga qarshi o‘tkazgan. Ushbu to‘qnashuvda hakamlar qaroriga ko‘ra durang qayd etilgan edi. Ushbu sportchilar o‘rtasidagi revansh jangi 9 may kuniga belgilangandi, biroq polshalik sobiq chempion tizzasidan jarohat olgani sababli bu to‘qnashuv bekor qilingan.