Ярим оғир вазн тоифасида UFC рейтингининг ўнинчи поғонасини банд этиб турган ўзбекистонлик спортчи Богдан Гусков 1 август куни Сербия пойтахти Белград шаҳрида бўлиб ўтадиган UFC Fight Night 283 турнирида октагонга кўтарилади. Гусковнинг мураббийи Гор Азизян Meta Fight нашрига берган интервьюсида бу маълумотни тасдиқлаган.

“Богдан 1 август кунги Сербиядаги турнирда жанг қилади, лекин ҳозирча кимга қарши эканлигини аниқ билмаймиз. Аммо UFC бизга Богдан шу санада у ерда бўлишини маълум қилди. Ҳозирча шартнома имзоланмаган, бироқ полшалик жангчининг розилик беришини кутяпмиз. Икки ҳафта олдин Блаховичнинг жароҳатланган оёғи билан юрганини кўргандим. Биз у билан жанг ўтказишни жудаям хоҳлаймиз”, дейди россиялик мутахассис.

Эслатиб ўтамиз, Гусков ўзининг сўнгги жангини 2025-йилнинг декабрь ойида Лас-Вегасдаги UFC 323 турнирида полшалик Ян Блаховичга қарши ўтказган. Ушбу тўқнашувда ҳакамлар қарорига кўра дуранг қайд этилган эди. Ушбу спортчилар ўртасидаги реванш жанги 9 май кунига белгиланганди, бироқ полшалик собиқ чемпион тиззасидан жароҳат олгани сабабли бу тўқнашув бекор қилинган.