«Barselona» klubi Markus Reshfordning shartnomasidagi sotib olish bandini faollashtirmaslik bo‘yicha yakuniy qarorga keldi. Ingliz hujumchisi ijara muddati tugaganidan keyin «Manchester Yunayted»ga qaytadi. Kataloniyaliklar ingliz klubi bilan kelishuvda ko‘rsatilgan 30 million yevroni to‘lashmaydigan bo‘ldi.
Bunga asosiy sabab sifatida yaqinda jamoaga kelib qo‘shilgan va maydonda xuddi shu pozisiyani egallagan Entoni Gordonning transferi ko‘rsatilmoqda. Mutaxassislarning ta’kidlashicha, Gordon bosh murabbiy Xans-Diter Flikning talablariga, ayniqsa, himoyadagi ish hajmi va raqib yarim maydonidagi pressing borasida yaxshiroq javob beradi. Bundan tashqari, yosh omili ham o‘z so‘zini aytdi: oktyabr oyida Reshford 29 yoshni qarshi oladi, Gordon esa undan ancha yosh.
Iqtisodiy nuqtai nazardan vaziyat deyarli teng edi. Garchi Reshford maoshining sezilarli darajada (taxminan 40 foizga) kamayishiga rozi bo‘lgan esa-da, transfer amortizasiyasi va boshqa xarajatlar uni klubda saqlab qolish qiymatini Gordonniki bilan bir xil darajaga keltirib qo‘yayotgan edi.
Endilikda Reshford Angliyaga qaytmoqda. Uning faoliyatini Myunxenning «Bavariya» klubida davom ettirish ehtimoli juda yuqori, chunki nemislar avvalroq futbolchini 30 million yevroga sotib olishga tayyor ekanliklarini bildirishgan edi.
