«Bavariya» bosh murabbiyi Vensan Kompani jamoaning ehtimoliy yangi a’zosi Nataniel Braun bilan suhbat o‘tkazib ulgurdi. Belgiyalik mutaxassis «Bavariya»ga yangi chap qanot himoyachisi zarur deb hisoblamoqda, chunki Alfonso Devis jarohatlar tufayli tez-tez safdan chiqib turibdi. Ayni shu pozisiya uchun Braun asosiy nishon sifatida belgilangan.

Bayern & Germany nashrining xabar berishicha, mavsum yakunlanganidan ko‘p o‘tmay, Kompani «Ayntraxt» futbolchisi bilan bog‘langan va unga o‘z rejalari haqida gapirib bergan.

Ko‘rinishidan, bosh murabbiy Braunni ko‘ndirishga muvaffaq bo‘lgan. 22 yoshli Germaniya terma jamoasi a’zosi Londonning «Arsenal» va Madridning «Real» klublari tomonidan bo‘layotgan qiziqishlarga qaramay, «Bavariya»ga o‘tishni istamoqda.

Frankfurtliklar yulduzining Transfermarkt portalidagi bahosi 40 million yevroni tashkil etadi.