Fransiya terma jamoasi sobiq himoyachisi Marsel Desayining fikricha, hujumchi Darvin Nunyes «Chelsi»da o‘z imkoniyatlarini muvaffaqiyatli namoyish eta olishi mumkin. London klubi uchun yozgi transferlar haqidagi savolga javob berar ekan, Desayi jamoaga Ernan Krespo yoki Filippo Indzagi kabi natija keltira oladigan futbolchi kerakligini ta’kidladi.

«Ushbu profilga mos keladigan futbolchi — "Liverpul“ning sobiq hujumchisi Darvin Nunyesdir. Agar unga ishonch berilsa, u sheriklarining maqomi o‘zinikidan yuqoriligi sababli o‘zini noqulay his qilmaydi. Ishonchim komil, "Chelsi"da u o‘zini ko‘rsata oladi va natija beradi», — deya Desayining so‘zlarini keltiradi Betway Insider.

Yakunlangan mavsumda 26 yoshli urugvaylik hujumchi Saudiya Arabistonining «Al-Hilol» klubi tarkibida to‘p surdi. U 24 ta o‘yinda 9 ta gol urdi va 5 ta golli uzatmani amalga oshirdi. Mavsumning ikkinchi yarmini esa legionerlar limiti bilan bog‘liq muammolar tufayli o‘tkazib yuborishga majbur bo‘ldi.