Франция терма жамоаси собиқ ҳимоячиси Марсель Десайининг фикрича, ҳужумчи Дарвин Нуньес «Челси»да ўз имкониятларини муваффақиятли намойиш эта олиши мумкин. Лондон клуби учун ёзги трансферлар ҳақидаги саволга жавоб берар экан, Десайи жамоага Эрнан Креспо ёки Филиппо Индзаги каби натижа келтира оладиган футболчи кераклигини таъкидлади.

«Ушбу профилга мос келадиган футболчи — "Ливерпуль“нинг собиқ ҳужумчиси Дарвин Нуньесдир. Агар унга ишонч берилса, у шерикларининг мақоми ўзиникидан юқорилиги сабабли ўзини ноқулай ҳис қилмайди. Ишончим комил, "Челси"да у ўзини кўрсата олади ва натижа беради», — дея Десайининг сўзларини келтиради Betway Insider.

Якунланган мавсумда 26 ёшли уругвайлик ҳужумчи Саудия Арабистонининг «Ал-Ҳилол» клуби таркибида тўп сурди. У 24 та ўйинда 9 та гол урди ва 5 та голли узатмани амалга оширди. Мавсумнинг иккинчи ярмини эса легионерлар лимити билан боғлиқ муаммолар туфайли ўтказиб юборишга мажбур бўлди.