Yaya Ture mustaqil bosh murabbiylik faoliyatini boshladi. 43 yoshli ivuarlik mutaxassisning bosh murabbiy etib tayinlanganini Slovakiyaning «Slovan» klubi e’lon qildi. Ture Slovakiyaning eng sovrindor klubi bilan uch mavsumga mo‘ljallangan shartnoma imzoladi.
Bunga qadar Yaya Ture yoshlar darajasida, shuningdek, turli murabbiylik shtablarida, jumladan, Saudiya Arabistoni terma jamoasida Roberto Manchiniga yordamchi sifatida faoliyat yuritgan edi. Endi esa ivuarlik sobiq futbolchi o‘z faoliyatida yangi sahifa ochmoqda.
«Slovan» o‘tgan mavsumda Slovakiya chempionligini qo‘lga kiritib, Chempionlar ligasi saralashiga yo‘llanma olgan edi. Jamoa Yevropaning eng nufuzli klublar turniridagi yurishini saralashning ikkinchi bosqichidan boshlaydi.
