Яя Туре мустақил бош мураббийлик фаолиятини бошлади. 43 ёшли ивуарлик мутахассиснинг бош мураббий этиб тайинланганини Словакиянинг «Слован» клуби эълон қилди. Туре Словакиянинг энг совриндор клуби билан уч мавсумга мўлжалланган шартнома имзолади.
Бунга қадар Яя Туре ёшлар даражасида, шунингдек, турли мураббийлик штабларида, жумладан, Саудия Арабистони терма жамоасида Роберто Манчинига ёрдамчи сифатида фаолият юритган эди. Энди эса ивуарлик собиқ футболчи ўз фаолиятида янги саҳифа очмоқда.
«Слован» ўтган мавсумда Словакия чемпионлигини қўлга киритиб, Чемпионлар лигаси саралашига йўлланма олган эди. Жамоа Европанинг энг нуфузли клублар турниридаги юришини саралашнинг иккинчи босқичидан бошлайди.
