Yarim himoyachi Mark Kasado yozgi transfer oynasida «Barselona»ni tark etishi deyarli aniq bo‘lib qoldi. Insayder Ekrem Konurning xabar berishicha, ispaniyalik futbolchi xizmatiga to‘rtta klub jiddiy qiziqish bildirmoqda.
Jumladan, Germaniyaning «Bayer» klubi hamda Saudiya Arabistonining «Al-Hilol» jamoalari Kasadoni o‘z safida ko‘rmoqchi. «Betis» esa «ko‘k-anorranglilar»ga allaqachon rasmiy taklif yuborib ulgurdi. Shuningdek, «Manchester Yunayted» klubi ham futbolchi atrofidagi vaziyatni yaqindan kuzatib bormoqda.
Ma’lumot uchun, Mark Kasado — «Barselona» akademiyasi tarbiyalanuvchisi bo‘lib, uning amaldagi shartnomasi 2028 yilning yoziga qadar mo‘ljallangan. 2025/26 yilgi mavsum davomida u barcha musobaqalarda 34 ta uchrashuvda maydonga tushib, bitta golli uzatmaga mualliflik qilgan. Transfermarkt portali iqtidorli futbolchini 18 million yevroga baholamoqda.
