Ярим ҳимоячи Марк Касадо ёзги трансфер ойнасида «Барселона»ни тарк этиши деярли аниқ бўлиб қолди. Инсайдер Экрем Конурнинг хабар беришича, испаниялик футболчи хизматига тўртта клуб жиддий қизиқиш билдирмоқда.
Жумладан, Германиянинг «Байер» клуби ҳамда Саудия Арабистонининг «Ал-Ҳилол» жамоалари Касадони ўз сафида кўрмоқчи. «Бетис» эса «кўк-анорранглилар»га аллақачон расмий таклиф юбориб улгурди. Шунингдек, «Манчестер Юнайтед» клуби ҳам футболчи атрофидаги вазиятни яқиндан кузатиб бормоқда.
Маълумот учун, Марк Касадо — «Барселона» академияси тарбияланувчиси бўлиб, унинг амалдаги шартномаси 2028 йилнинг ёзига қадар мўлжалланган. 2025/26 йилги мавсум давомида у барча мусобақаларда 34 та учрашувда майдонга тушиб, битта голли узатмага муаллифлик қилган. Transfermarkt портали иқтидорли футболчини 18 миллион еврога баҳоламоқда.
