Braziliya terma jamoasi afsonasi Romario milliy terma jamoaning jahon chempionati guruh bosqichi doirasida Marokashga qarshi o‘yinda qayd etgan durang natijasi (1:1) haqida fikr bildirdi.
«Biz imkoniyatlar yaratdik, ammo ularning ko‘pidan foydalana olmadik. Hozir bizda darvoza oldida haqiqiy «qotil» (to‘purar) yo‘q. Vaziyatlar ko‘p, ammo gollar kam. Men har kuni Igor Tyago o‘rniga Joao Pedroni tanlagan bo‘lardim. Hujumchining ishi juda oddiy: bitta imkoniyat, bitta gol. Bizda bu yetishmadi», — dedi Romario.
Eslatib o‘tamiz, Marokashga qarshi o‘yinda braziliyaliklar birinchi bo‘lib gol o‘tkazib yuborishdi, keyinchalik Vinisius Junior hisobni tenglashtirdi. JCH-2026 ikkinchi turida Braziliya terma jamoasi Gaiti terma jamoasiga qarshi maydonga tushadi.













