Madridning «Real» klubi sobiq yarim himoyachisi Zinedin Zidan Fransiya terma jamoasining 2026 yilgi Jahon chempionatidagi debyut uchrashuviga tashrif buyurmaydi. Bu haqda «L'Équipe» nashri jurnalistlari xabar bermoqda.
Manba bergan ma’lumotlarga ko‘ra, «Zizu» «uchranglilar»ning o‘yinini Jazoir va Argentina o‘rtasidagi bahs sababli o‘tkazib yuboradi. Afsonaviy futbolchi ushbu afrikalik terma jamoa sharafini himoya qilayotgan o‘g‘li Lyukaning maydondagi harakatlarini o‘z ko‘zi bilan bevosita kuzatishni istamoqda.
Fransiya – Senegal uchrashuvi seshanba kuni, 16 iyun kuni bo‘lib o‘tadi. Jazoir va Argentina terma jamoalari o‘rtasidagi bahs esa 17 iyun kuni Toshkent vaqti bilan soat 06:00 ga belgilangan.
Eslatib o‘tamiz, Jahon chempionati Shimoliy Amerikaning uchta mamlakati: AQSH, Kanada va Meksika maydonlarida bo‘lib o‘tmoqda.













