Argentina milliy terma jamoasi Jahon chempionatidagi ishtirokini Jazoirga qarshi bahs bilan boshlaydi. Uchrashuv chorshanba kuni, 17 iyun kuni bo‘lib o‘tadi va o‘yin Toshkent vaqti bilan soat 06:00 da boshlanishi rejalashtirilgan.

Taniqli insayder Gaston Edulning bergan ma’lumotlariga ko‘ra, «albiseleste»ning asosiy tarkibidan Lautaro Martines joy olishi kutilmoqda. Ko‘rinishidan, bosh murabbiy Lionel Skaloni «Inter» klubi sardorini boshqa hujumchilardan ustun ko‘rgan.

Guruh bosqichining ikkinchi va uchinchi turlarida argentinaliklar Avstriya va Iordaniya terma jamoalari bilan kuch sinashadilar — ushbu bahslar mos ravishda 22 va 28 iyun kunlari bo‘lib o‘tadi.

Eslatib o‘tamiz, Argentina terma jamoasi amaldagi jahon chempioni hisoblanadi. Avvalgi mundial finalida ular Fransiya terma jamoasini mag‘lub etishgan edi.