2026 yilgi Jahon chempionatining dastlabki 8 ta uchrashuvidan birortasi ham belgilangan jadval bo‘yicha aniq vaqtida boshlangani yo‘q. Uchrashuv startini bildiruvchi hushtakining o‘rtacha kechikishi taxminan 3 daqiqani tashkil etdi, eng sezilarli kechikish esa Meksika va Janubiy Afrika Respublikasi (JAR) o‘rtasidagi ochilish o‘yinida kuzatildi — bahs belgilangan vaqtdan 6 daqiqa kechikib boshlandi.

Shotlandiya va Gaiti terma jamoalari o‘rtasidagi uchrashuv ham taxminan 3 daqiqalik kechikish bilan start oldi. O‘z terma jamoasining Jahon chempionatiga qaytishini 28 yil kutgan shotlandiyalik muxlislar uchun bu bir necha daqiqalik qo‘shimcha kutish katta muammo tug‘dirmagan bo‘lsa-da, vaziyat turnir tashkilotchilarining e’tiborini tortdi.

BBC nashrining qayd etishicha, FIFA har bir o‘yinga tayyorgarlik jarayonini mayda detallarigacha tartibga soladi. Har bir bahs uchun jamoalarning maydonga chiqish vaqti, tribuna osti yo‘lagida saf tortishi, madhiyalarning ijro etilishi va boshqa jarayonlar aniq yozib qo‘yilgan maxsus ssenariy mavjud. Biroq amaliyotda futbolchilar har doim ham belgilangan grafikka rioya qilishga ulgurishmayapti.

Kechikishlarning asosiy sabablaridan biri — o‘yin oldi marosimlarining yangilangan formati bo‘lishi mumkin. Endilikda madhiyalar ijro etilayotgan vaqtda maydonda nafaqat asosiy tarkib, balki qaydnomaga kiritilgan barcha futbolchilar hozir bo‘lishmoqda. Bundan tashqari, maydonda ulkan milliy bayroqlar yoziladi, bu esa tashkiliy jarayonni ancha murakkablashtiradi.

FIFA vakillarining fikricha, bunday marosim «birdamlik, faxr va hayajon lahzalarini» taqdim etadi, biroq uni o‘tkazish ko‘proq vaqt va o‘zaro muvofiqlikni talab qilmoqda.

Turnir davomida jamoalar va tashkilotchilar ushbu yangi protokolga yaxshiroq moslashib olishlari kutilmoqda.