2026 йилги Жаҳон чемпионатининг дастлабки 8 та учрашувидан бирортаси ҳам белгиланган жадвал бўйича аниқ вақтида бошлангани йўқ. Учрашув стартини билдирувчи ҳуштакининг ўртача кечикиши тахминан 3 дақиқани ташкил этди, энг сезиларли кечикиш эса Мексика ва Жанубий Африка Республикаси (ЖАР) ўртасидаги очилиш ўйинида кузатилди — баҳс белгиланган вақтдан 6 дақиқа кечикиб бошланди.
Шотландия ва Гаити терма жамоалари ўртасидаги учрашув ҳам тахминан 3 дақиқалик кечикиш билан старт олди. Ўз терма жамоасининг Жаҳон чемпионатига қайтишини 28 йил кутган шотландиялик мухлислар учун бу бир неча дақиқалик қўшимча кутиш катта муаммо туғдирмаган бўлса-да, вазият турнир ташкилотчиларининг эътиборини тортди.
BBC нашрининг қайд этишича, ФИФА ҳар бир ўйинга тайёргарлик жараёнини майда деталларигача тартибга солади. Ҳар бир баҳс учун жамоаларнинг майдонга чиқиш вақти, трибуна ости йўлагида саф тортиши, мадҳияларнинг ижро этилиши ва бошқа жараёнлар аниқ ёзиб қўйилган махсус сценарий мавжуд. Бироқ амалиётда футболчилар ҳар доим ҳам белгиланган графикка риоя қилишга улгуришмаяпти.
Кечикишларнинг асосий сабабларидан бири — ўйин олди маросимларининг янгиланган формати бўлиши мумкин. Эндиликда мадҳиялар ижро этилаётган вақтда майдонда нафақат асосий таркиб, балки қайдномага киритилган барча футболчилар ҳозир бўлишмоқда. Бундан ташқари, майдонда улкан миллий байроқлар ёзилади, бу эса ташкилий жараённи анча мураккаблаштиради.
ФИФА вакилларининг фикрича, бундай маросим «бирдамлик, фахр ва ҳаяжон лаҳзаларини» тақдим этади, бироқ уни ўтказиш кўпроқ вақт ва ўзаро мувофиқликни талаб қилмоқда.
Турнир давомида жамоалар ва ташкилотчилар ушбу янги протоколга яхшироқ мослашиб олишлари кутилмоқда.
