Fransiyalik jurnalist Daniel Riolo Portugaliya terma jamoasi hujumchisi Krishtianu Ronalduning Jahon chempionati-2026 1-turidan o‘rin olgan Kongo DRga qarshi o‘yindagi (1:1) harakatlarini keskin tanqid ostiga oldi.
«Krishtianu Ronaldu — bu ortiqcha yuk. Portugaliya maydonda 10 nafar futbolchi va oldinda turgan bitta ustun bilan o‘ynadi. Messi va Ronaldu o‘rtasidagi farq shundaki, Leo o‘zining 20 yoshda emasligini, yoshi mana 40 ga yaqinlashib qolganini va faoliyati yakuniga yetayotganini yaxshi tushunadi. U o‘zini shunga yarasha tayyorlaydi, jamoa va murabbiy ham mana shu reallik bilan yashab, unga hamda uning jamoa muvaffaqiyatiga qanday qilib eng yaxshi hissa qo‘sha olishiga moslashadi.
Ronaldu esa o‘z xayoliy dunyosida yashaydigan inson. U hali ham 25 yoshdaman, hamon top-klubda o‘ynayapman, qarimadim va avvalgi darajamda chiqish qilyapman, deb o‘ylaydi. Natijada, ular jamoani Ronalduning kuchli tomonlari atrofida emas, balki uning zaif jihatlariga qarab qurishmoqda», — deya Rioloning so‘zlaridan iqtibos keltirmoqda RMC Sport.
41 yoshli Ronaldu maydonda to‘liq 90 daqiqa harakat qildi, biroq birorta ham samarali harakatni amalga oshira olmadi.
Eslatib o‘tamiz, Argentina terma jamoasi JCH-2026 ning ilk turida Lionel Messining xet-triki evaziga Jazoirni tor-mor etdi (3:0). 38 yoshli argentinalik yulduz Jahon chempionatlaridagi gollari soni bo‘yicha Miroslav Klozening mutlaq rekordiga tenglashib oldi — ularning hisobida 16 tadan gol mavjud.
JCH-2026 ning ikkinchi turida portugaliyaliklar O‘zbekiston terma jamoasiga qarshi maydonga tushishadi. Ushbu uchrashuv 23 iyun kuni bo‘lib o‘tadi.
