Fransiya terma jamoasi yarim himoyachisi Orelyen Tchuameni hujumchi Usman Dembelening milliy jamoadagi roli haqida fikr bildirdi. Fransiyaning JCH-2026 doirasida Senegalga qarshi kechgan dastlabki uchrashuvida Dembele asosiy tarkibda maydonga tushdi, biroq samarali harakatlar bilan ajralib tura olmadi va 80-daqiqada zaxiraga olindi.
«Uning o‘zi shundoq ham jamoaning bosh unsuridir. U hammadan ko‘p kuladigan, o‘zini qulay his qilishga majbur etadigan va ertalablari doim a’lo kayfiyatda yuradigan yigit.
Maydonda esa u yarim himoya va hujumni bog‘laydi. U — jamoamiz yetakchisi. Tarkibda «Oltin to‘p» sohibi borligi — bu katta omad. Odamlar buni anglab yetishyaptimi-yo‘qmi, bilmayman, lekin bu juda ajoyib», — deya Tchuamenining so‘zlarini keltiradi X ijtimoiy tarmog‘idagi Actu Foot akkaunti.
Turnirning guruh bosqichi keyingi turlarida Fransiya Iroq (23 iyun) va Norvegiya (26 iyun) terma jamoalariga qarshi maydonga tushadi.
