Франция терма жамоаси ярим ҳимоячиси Орельен Тчуамени ҳужумчи Усман Дембеленинг миллий жамоадаги роли ҳақида фикр билдирди. Франциянинг ЖЧ-2026 доирасида Сенегалга қарши кечган дастлабки учрашувида Дембеле асосий таркибда майдонга тушди, бироқ самарали ҳаракатлар билан ажралиб тура олмади ва 80-дақиқада захирага олинди.

«Унинг ўзи шундоқ ҳам жамоанинг бош унсуридир. У ҳаммадан кўп куладиган, ўзини қулай ҳис қилишга мажбур этадиган ва эрталаблари доим аъло кайфиятда юрадиган йигит.

Майдонда эса у ярим ҳимоя ва ҳужумни боғлайди. У — жамоамиз етакчиси. Таркибда «Олтин тўп» соҳиби борлиги — бу катта омад. Одамлар буни англаб етишяптими-йўқми, билмайман, лекин бу жуда ажойиб», — дея Тчуаменининг сўзларини келтиради X ижтимоий тармоғидаги Actu Foot аккаунти.

Турнирнинг гуруҳ босқичи кейинги турларида Франция Ироқ (23 июнь) ва Норвегия (26 июнь) терма жамоаларига қарши майдонга тушади.