«Nottingem Forest» klubining markaziy yarim himoyachisi Elliot Anderson faoliyatini «Manchester Siti»da davom ettiradi. Bu haqda Purple Panel nashri eksklyuziv tarzda xabar bermoqda.
Manba bergan ma’lumotlarga ko‘ra, tomonlar Elliotning transferini 138 million yevro evaziga to‘liq kelishib olishgan. Ushbu transfer «shaharliklar» tarixidagi eng yirik va Angliya Premyer-ligasi tarixidagi ikkinchi eng qimmat xaridga aylanadi.
Tez orada 23 yoshli Anderson AQSHda tibbiy ko‘rikdan o‘tadi va shundan so‘ng «Manchester Siti» bilan 5 yillik shartnoma imzolaydi. Shartnomada uni yana bir mavsumga uzaytirish imkoniyati ham ko‘zda tutilgan.
Yakunlangan klub mavsumida Anderson barcha musobaqalarda jami 50 ta uchrashuvda maydonga tushib, 4 ta gol urdi va 5 ta golli uzatmaga mualliflik qildi.
