«Ноттингем Форест» клубининг марказий ярим ҳимоячиси Эллиот Андерсон фаолиятини «Манчестер Сити»да давом эттиради. Бу ҳақда Purple Panel нашри эксклюзив тарзда хабар бермоқда.

Манба берган маълумотларга кўра, томонлар Эллиотнинг трансферини 138 миллион евро эвазига тўлиқ келишиб олишган. Ушбу трансфер «шаҳарликлар» тарихидаги энг йирик ва Англия Премьер-лигаси тарихидаги иккинчи энг қиммат харидга айланади.

Тез орада 23 ёшли Андерсон АҚШда тиббий кўрикдан ўтади ва шундан сўнг «Манчестер Сити» билан 5 йиллик шартнома имзолайди. Шартномада уни яна бир мавсумга узайтириш имконияти ҳам кўзда тутилган.

Якунланган клуб мавсумида Андерсон барча мусобақаларда жами 50 та учрашувда майдонга тушиб, 4 та гол урди ва 5 та голли узатмага муаллифлик қилди.