Rossiya terma jamoasining sobiq futbolchisi Dmitriy Alenichev JCH-2026 musobaqasida Portugaliya terma jamoasining startdagi o‘yini haqida o‘z fikrlari bilan o‘rtoqlashdi.

Portugaliyaning Kongo DRga qarshi bahsini sharhlar ekan, Alenichev Roberto Martines shogirdlaridan butunlay boshqacha futbol kutganini ta’kidladi.

«Tarkibni hisobga olsak, bu ko‘pchilik jahon chempionatida ko‘rishni istagan jamoa emasdi», — dedi Alenichev.

Uning so‘zlariga ko‘ra, tezkor goldan keyin Portugaliya ustunlikni oshirish o‘rniga haddan tashqari akademik uslubda o‘ynay boshlagan.

«Klassik akademik futbol: yonlama uzatmalar, orqaga paslar, biroz oldinga harakat. Shunchaki to‘p nazorati. Bu esa ajoyib yarim himoya chizig‘iga ega jamoa uchun g‘alati holat», — dedi mutaxassis.

Alenichev Krishtianu Ronalduning jamoadagi o‘rni haqida ham alohida to‘xtaldi. Uning fikricha, murabbiylar shtabi jamoa sardori bo‘yicha jiddiy qaror qabul qilishi lozim.

«Uning asosiy tarkibda maydonga tushishi va o‘yini nafaqat meni, balki Krishtianuga bo‘lgan muhabbatiga qaramay portugaliyalik muxlislarni ham bezovta qila boshladi. Bosh murabbiy bu masalada qandaydir keskin qaror qabul qilishi kerak», — dedi Alenichev.

«Spartak» klubining sobiq bosh murabbiyi Ronaldu hanuz buyuk futbolchi ekanini tan oldi. Biroq uning fikricha, hozirgi paytda forvardning maydonda bo‘lishi jamoaning tezkor va samarali harakat qilishini qiyinlashtirmoqda.

«Ronaldu bilan jamoa xuddi “langar” bilan harakatlanayotgandek. Ammo uni zaxirada qoldirish ham kiyinish xonasida muammo keltirib chiqarishi mumkin. Shuning uchun Roberto Martines oldida juda murakkab tanlov turibdi», — deya qo‘shimcha qildi Alenichev.

Jahon chempionati-2026 AQSH, Kanada va Meksikada o‘tkazilmoqda. Turnir tarixida ilk bor 48 ta terma jamoa ishtirok etmoqda.