Россия терма жамоасининг собиқ футболчиси Дмитрий Аленичев ЖЧ-2026 мусобақасида Португалия терма жамоасининг стартдаги ўйини ҳақида ўз фикрлари билан ўртоқлашди.

Португалиянинг Конго ДРга қарши баҳсини шарҳлар экан, Аленичев Роберто Мартинес шогирдларидан бутунлай бошқача футбол кутганини таъкидлади.

«Таркибни ҳисобга олсак, бу кўпчилик жаҳон чемпионатида кўришни истаган жамоа эмасди», — деди Аленичев.

Унинг сўзларига кўра, тезкор голдан кейин Португалия устунликни ошириш ўрнига ҳаддан ташқари академик услубда ўйнай бошлаган.

«Классик академик футбол: ёнлама узатмалар, орқага паслар, бироз олдинга ҳаракат. Шунчаки тўп назорати. Бу эса ажойиб ярим ҳимоя чизиғига эга жамоа учун ғалати ҳолат», — деди мутахассис.

Аленичев Криштиану Роналдунинг жамоадаги ўрни ҳақида ҳам алоҳида тўхталди. Унинг фикрича, мураббийлар штаби жамоа сардори бўйича жиддий қарор қабул қилиши лозим.

«Унинг асосий таркибда майдонга тушиши ва ўйини нафақат мени, балки Криштиануга бўлган муҳаббатига қарамай португалиялик мухлисларни ҳам безовта қила бошлади. Бош мураббий бу масалада қандайдир кескин қарор қабул қилиши керак», — деди Аленичев.

«Спартак» клубининг собиқ бош мураббийи Роналду ҳануз буюк футболчи эканини тан олди. Бироқ унинг фикрича, ҳозирги пайтда форварднинг майдонда бўлиши жамоанинг тезкор ва самарали ҳаракат қилишини қийинлаштирмоқда.

«Роналду билан жамоа худди “лангар” билан ҳаракатланаётгандек. Аммо уни захирада қолдириш ҳам кийиниш хонасида муаммо келтириб чиқариши мумкин. Шунинг учун Роберто Мартинес олдида жуда мураккаб танлов турибди», — дея қўшимча қилди Аленичев.

Жаҳон чемпионати-2026 АҚШ, Канада ва Мексикада ўтказилмоқда. Турнир тарихида илк бор 48 та терма жамоа иштирок этмоқда.