Braziliya terma jamoasi yarim himoyachisi Kazemiro Jahon chempionatining 1/16 finalida Yaponiya ustidan qozonilgan irodali g‘alabadan (2:1) so‘ng o‘z fikrlarini bildirdi.
«Jamoamizning eng bosh ustunligi — bu bizning ruhiyatimiz bo‘ldi. Biz hujumda raqibga tinimsiz bosim o‘tkazib turdik. Jahon chempionatida zaxiradan maydonga tushadigan futbolchilarni qadrlash juda muhim ahamiyatga ega. Bugun Endrik zaxiradan qo‘shilib juda yaxshi o‘ynadi, Martinelli — yana bir ajoyib futbolchi, Rayan esa Rafinyaning o‘rnini munosib tarzda to‘ldirmoqda. Mana shu bizning ruhiyatimiz va bu — Jahon chempionatida g‘olib chiqishga qodir bo‘lgan tarkib», — deya Kazemironing so‘zlarini keltiradi FIFA rasmiy sayti.
JCH-2026ning 1/8 finalida Braziliya terma jamoasi 5 iyul kuni Kot-d’Ivuar – Norvegiya bahsi g‘olibiga qarshi maydonga tushadi.
