Germaniya terma jamoasi tarkibida 2014 yilgi jahon chempioni Mats Xummels jamoaning JCH-2026 1/16 finalida Paragvaydan uchragan mag‘lubiyatidan so‘ng (1:1, penaltilar bo‘yicha — 3:4) o‘z fikrlarini bildirdi.

«Agar mas’ul shaxslar nuqtai nazaridan qaraydigan bo‘lsak, bu shunchaki dahshatli vaziyat. Bundan boshqacha aytib bo‘lmaydi. Oxirgi 3 yil ichida bizda uydagi Yevro, uydagi Millatlar ligasi va ko‘plab ishtirokchilardan iborat ushbu turnir (JCH) bo‘ldi.

Uydagi Yevro haqida hali ham haddan tashqari ko‘p gapirishmoqda. Qolgan ikkita turnir esa hafsalani pir qildi. Buni terma jamoa murabbiyi ham, federasiya ham muhokama qilishi kerak. Hech bo‘lmaganda qandaydir bahs-munozaralar bo‘lishi shart. Bundan boshqacha bo‘lishi mumkin emas. Futbol — juda raqobatdosh sport turi.

Futbolchilarga kelsak, ba’zilar terma jamoadan o‘zi ketishini tasavvur qila olaman. Ammo, shuningdek, jamoa tarkibida to‘rtta, beshta yoki oltita turnirda qatnashib ulgurgan 30 yosh atrofidagi futbolchilar bo‘yicha ham qarorlar qabul qilinishi kerak deb hisoblayman. Ularda yaxshi natijalarga erishish imkoniyati bor edi, lekin buni uddalay olishmadi.

Balki bu futbolchilar haqida o‘ylab ko‘rish kerakdir. Yevro-2016dan keyin birorta ham kuchli turnir bo‘lmadi — men uchun bu shunchaki tasodif emas. Gap butun bir o‘n yillik haqida ketmoqda.

Hamma narsa birinchi navbatda futbolchilardan boshlanadi. Bu vaqt ichida bizda allaqachon bir nechta murabbiy almashdi. Men ba’zi futbolchilar terma jamoadagi faoliyatini o‘zlari yakunlashini kutyapman. Shu bilan birga, bosh murabbiy ham — hozirgisimi yoki yangisimi — nimanidir hal qilishi kerak», — dedi Xummels.