«Napoli» klubi sobiq bosh murabbiyi Antonio Konte Italiya milliy terma jamoasini boshqarish uchun o‘z moliyaviy talablarini sezilarli darajada kamaytirishga tayyor. Bu haqda Calciomercato nashri xabar bermoqda.
56 yoshli mutaxassis daromadining 50 foizga tushishiga qarshi emas. Agar Konte «Napoli»da yiliga taxminan 8 million yevro ishlab topgan bo‘lsa, milliy terma jamoadagi faoliyat uchun u mavsumga taxminan 4 million yevro olishga rozi.
Bunday talablar bilan Kontening tayinlanishi baribir Roberto Manchinini taklif qilishdan ko‘ra qimmatroqqa tushadi. Manbaning bergan ma’lumotiga ko‘ra, Manchini 2 million yevro maoshga rozilik bildirgan.
Italiya terma jamoasi bosh murabbiyi posti Jennaro Gattuzo ketganidan keyin bo‘shab qolgan edi. Gattuzo Italiyani Jahon chempionatiga olib chiqa olmagandi.
