Ispaniyalik mashhur yarim himoyachi Santi Kasorla 41 yoshida professional futbolchilik faoliyatini yakunlashga qaror qildi. Bu haqda futbolchi ijtimoiy tarmoqlarda e’lon qildi.

«Shunday hikoyalar borki, ular hech qachon tugamaydi. Ular abadiy qoladi. Hammasi uchun rahmat», — deb yozdi Kasorla.

Yarim himoyachining so‘nggi klubi «Real Ovyedo» bo‘ldi, Kasorla o‘z faoliyatini aynan shu klubda bundan 25 yil avval boshlagan edi. Ortda qolgan mavsumda yarim himoyachi La Liga doirasida 28 ta o‘yinda maydonga tushdi va bitta golli uzatmani amalga oshirdi. Kasorla faoliyati davomida Londonning «Arsenal», «Vilyarreal», «Malaga» va Qatarning «As-Sadd» klublarida ham to‘p surgan.

Kasorla Ispaniya terma jamoasi safida ikki karra Yevropa chempioni hisoblanadi. Shuningdek, u «Arsenal» bilan birgalikda ikki martadan Angliya Kubogi va Superkubogida g‘olib chiqqan.