2026 yilgi jahon chempionati vaqtida Tunis terma jamoasining sakkiz nafar futbolchisi topshirgan doping-testlarda klenbuterol moddasi bo‘yicha atipik natijalar qayd etildi. Bu haqda Daily Mail xabar berdi.

Manba ma’lumotiga ko‘ra, futbolchilarning namunalarida taqiqlangan preparat izlari aniqlangan. Biroq keyingi tekshiruvlar shuni ko‘rsatdiki, bu holatning eng ehtimoliy sababi Meksikadagi jamoa yig‘inida iste’mol qilingan zararlangan go‘sht bo‘lgan. Tergov davomida moddaning sport natijalarini yaxshilash maqsadida ataylab qabul qilinganiga doir dalillar topilmagan.

Qayd etilishicha, futbolchilarning klublari vaziyatdan xabardor qilingan. Shu bilan birga, o‘yinchilarga nisbatan qandaydir intizomiy choralar qo‘llanilishi kutilmayapti.

Klenbuterol Butunjahon dopingga qarshi agentligi (WADA) taqiqlangan moddalar ro‘yxatiga kiritilgan. Ayrim davlatlarda, jumladan Meksikada, ushbu preparat chorvachilikda yirik shoxli mollar o‘sishini tezlashtirish maqsadida qo‘llanilishi mumkin. Shu sababli avval ham sportchilar organizmiga bu moddaning oziq-ovqat orqali tushishi bilan bog‘liq holatlar kuzatilgan.

Eslatib o‘tamiz, Tunis terma jamoasi JCH-2026 da muvaffaqiyatsiz ishtirok etdi. Jamoa Shvesiyaga (1:5), Yaponiyaga (0:4) va Niderlandiyaga (1:3) mag‘lub bo‘ldi. Turnirdagi ilk uchrashuvdan keyin bosh murabbiy Sabri Lyamushi iste’foga chiqarildi. Shu tariqa, Tunis jahon chempionatlari tarixida birinchi o‘yindan so‘ng bosh murabbiyini almashtirgan ilk terma jamoaga aylangan edi.