«Andijon» hamda Rossiyaning «Enisey» (1:1) jamoalari o‘rtasidagi o‘rtoqlik uchrashuvidan keyin raqib jamoa bosh murabbiyi Sergey Tashuyev «Andijon» matbuot xizmatiga o‘z fikrlari bilan o‘rtoqlashdi.

— O‘yin haqida fikringiz qanday?

— Yaxshi sparring bo‘ldi. Raqib tarkibida mahalliy va xorijlik futbolchilarning borligi o‘yinning qizg‘in o‘tishiga sabab bo‘ldi.

— Bir so‘z bilan aytganda, «Andijon» sizda qanday taassurot qoldirdi?

— Yuqorida aytganimdek, tarkib yaxshi va shunga mos ravishda bahsimiz ancha qizg‘in kechdi. Ammo futbolda o‘sishning chegarasi bo‘lmaydi. Ana shunday nazorat uchrashuvlari orqali murabbiylar qaysi jihatlarga ko‘proq e’tibor qaratish kerakligini bilib olishadi.

— O‘yindan ko‘nglingiz to‘ldimi?

— Umumiy ma’noda so‘rayapsizmi yoki jamoamning o‘yini haqidami?

— Umumiy ma’noda...

— Albatta, ko‘nglim to‘ldi. Qiziqarli va kurashlarga boy uchrashuv guvohi bo‘ldik. Bunday o‘yin hammaga foydali. Ayniqsa, tarkibdagi yosh futbolchilar uchun juda katta tajriba bo‘ladi.

— Jamoamizdagi qaysi futbolchilar sizda yaxshi taassurot qoldirdi?

— Futbolchilaringizning ism-shariflarini bilmayman. Menga ko‘proq hujum chizig‘ining o‘ng qanotida harakat qilgan futbolchingiz ma’qul keldi. Ammo, rostini aytsam, uchrashuv davomida butun e’tiborim o‘z shogirdlarimda bo‘ldi.