«Fenerbaxche» klubi Grinvud bo‘yicha muzokaralar olib borilayotgani haqidagi mish-mishlarni rasman rad etdi, deb yozadi football-italia.net nashri.

«Roma» klubi jiddiy tarzda kuzatayotgan «Marsel» vingeri Meyson Grinvudning transferi bilan bog‘liq vaziyat yangi mish-mishlar bilan boyishda davom etmoqda. Turkiyaning «Fenerbaxche» klubi rasmiy bayonot bilan chiqib, Fransiya klubi bilan muzokaralar olib borilayotgani haqidagi ma’lumotlarni inkor etdi.

Avvalroq turkiyalik insayder Yag‘iz Sabunjuo‘g‘li «Fenerbaxche» Grinvud uchun «Marsel»ga 50 million yevro to‘lashga tayyor ekanligini va go‘yoki klubning ikki nafar vakili muzokaralar o‘tkazish uchun Fransiyaga uchib ketganini da’vo qilgan edi.

Bunga javoban Istanbul grandi rasmiy bayonot e’lon qilib, ayni damda klubdan hech kim transfer muzokaralari olib borish uchun Fransiyada bo‘lib turmaganini qat’iy ta’kidladi. Klub rahbariyati muxlislarni noto‘g‘ri ma’lumotlar bilan muntazam ravishda chalg‘itishga bo‘layotgan urinishlar tufayli ushbu bayonotni berishga majbur bo‘lganini qayd etdi.

Shunga qaramay, insayder Sabunjuo‘g‘lining manbasi va Fransiyaning Footmercato nashri «Fenerbaxche» direktori Feridun Gejel baribir Fransiyada bo‘lib turganini da’vo qilishda davom etmoqda.