Argentina terma jamoasi hujumchisi Lionel Messi JCH-2026 1/8 finali doirasida Misr terma jamoasiga qarshi kechgan bahsda (3:2) gol urdi.

39 yoshli futbolchi 83-daqiqada o‘yindan unumli foydalanib, darvozani ishg‘ol qildi. Bu gol o‘yin davomida hisobda ortda qolayotgan lotin amerikaliklarga hisobni tenglashtirish imkonini berdi.

Bundan tashqari, misrliklar darvozasiga kiritilgan gol Messi uchun jahon chempionatlari pley-off bosqichidagi 7-gol bo‘ldi. U mundiallar tarixida ketma-ket 6 ta o‘yinda gol urishga muvaffaq bo‘ldi.

Argentina g‘alaba qozongan 2022 yilgi Qatardagi turnirda Messi pley-offda 5 ta gol urgan: u 1/8 finalda Avstraliya (2:1), chorak finalda Niderlandiya (2:2, penaltilar bo‘yicha 4:3) va yarim finalda Xorvatiya (3:0)ga qarshi kechgan o‘yinlarda bittadan, finalda esa Fransiyaga (3:3, 4:2 penaltilar bo‘yicha) qarshi o‘yinda dubl qayd etgandi.

JCH-2026da Messi bungacha 1/16 finalda Kabo-Verde (3:2) darvozasini ishg‘ol qilgan edi.

Portugaliya terma jamoasi forvardi Krishtianu Ronalduda esa JCH pley-offlarida bitta gol bor — u JCH-2026 1/16 finalida Xorvatiyaga (2:1) qarshi kechgan bahsda penaltidan gol urgandi. Portugaliyaliklar 1/8 finalda Ispaniyaga (0:1) imkoniyatni boy berib, turnirni tark etishdi.

Messi va Ronaldu 2006 yildan boshlab 6 ta jahon chempionatida ishtirok etishdi. Ikkala futbolchi ham uzoq vaqt davomida dunyoning eng yaxshi futbolchisi maqomi uchun asosiy raqiblar hisoblangan. Argentinalik futbolchi 8 marta «Oltin to‘p»ni qo‘lga kiritgan, portugaliyalikda esa bunday sovrinlar soni 5 tani tashkil etadi.