Аргентина терма жамоаси ҳужумчиси Лионель Месси ЖЧ-2026 1/8 финали доирасида Миср терма жамоасига қарши кечган баҳсда (3:2) гол урди.

39 ёшли футболчи 83-дақиқада ўйиндан унумли фойдаланиб, дарвозани ишғол қилди. Бу гол ўйин давомида ҳисобда ортда қолаётган лотин америкаликларга ҳисобни тенглаштириш имконини берди.

Бундан ташқари, мисрликлар дарвозасига киритилган гол Месси учун жаҳон чемпионатлари плей-офф босқичидаги 7-гол бўлди. У мундиаллар тарихида кетма-кет 6 та ўйинда гол уришга муваффақ бўлди.

Аргентина ғалаба қозонган 2022 йилги Қатардаги турнирда Месси плей-оффда 5 та гол урган: у 1/8 финалда Австралия (2:1), чорак финалда Нидерландия (2:2, пенальтилар бўйича 4:3) ва ярим финалда Хорватия (3:0)га қарши кечган ўйинларда биттадан, финалда эса Францияга (3:3, 4:2 пенальтилар бўйича) қарши ўйинда дубль қайд этганди.

ЖЧ-2026да Месси бунгача 1/16 финалда Кабо-Верде (3:2) дарвозасини ишғол қилган эди.

Португалия терма жамоаси форварди Криштиану Роналдуда эса ЖЧ плей-оффларида битта гол бор — у ЖЧ-2026 1/16 финалида Хорватияга (2:1) қарши кечган баҳсда пенальтидан гол урганди. Португалияликлар 1/8 финалда Испанияга (0:1) имкониятни бой бериб, турнирни тарк этишди.

Месси ва Роналду 2006 йилдан бошлаб 6 та жаҳон чемпионатида иштирок этишди. Иккала футболчи ҳам узоқ вақт давомида дунёнинг энг яхши футболчиси мақоми учун асосий рақиблар ҳисобланган. Аргентиналик футболчи 8 марта «Олтин тўп»ни қўлга киритган, португалияликда эса бундай совринлар сони 5 тани ташкил этади.