Antuan Grizmann «Orlando Siti»ga o‘tganidan keyingi his-tuyg‘ulari bilan o‘rtoqlashdi.

Seshanba kuni «Atletiko»ning sobiq hujumchisi rasman MLS jamoasi o‘yinchisi sifatida tanishtirildi.

«MLSga kelishni 18 yoshimdan beri orzu qilardim. Men uchun jismoniy va ruhiy jihatdan yaxshi holatda kelish juda muhim edi, shuning uchun ham bu qadamni tashladim. Klub bilan darhol ajoyib munosabatlar o‘rnatdim, shahar menga juda yoqdi, farzandlarim esa xursand. Bu men va oilam uchun aqlbovar qilmas va kutilmagan holat bo‘ldi, umid qilamanki, bu mehrga javob qaytara olamiz.

Men bu yerdagi va Yevropadagi saviya o‘rtasida katta farq ko‘rmadim. Men bu yerga sovrinlar yutish, muxlislar bilan muloqot qilish va jamoadoshlarimni ham professional, ham shaxsiy jihatdan rivojlanishiga yordam berish uchun keldim.

Derbi [«Inter Mayami»ga qarshi] haqida ko‘p eshitganman. Ularning oxirgi o‘yinini tomosha qildim. Messiga qarshi yana o‘ynash, shuningdek, o‘zimning ajoyib munosabatlarim bo‘lgan Rodrigo [De Pol] bilan birga bo‘lish yoqimli bo‘ladi», — dedi Grizmann «Orlando» o‘yinchisi sifatidagi taqdimotida.