Mark-Andre ter Shtegenning «Barselona»dan «Ayaks»ga ijaraga o‘tishi kechikayotgani ma’lum bo‘ldi. Klublar rahbariyati haligacha bitimning so‘nggi tafsilotlarini kelishib olmagan.
Mundo Deportivo xabariga ko‘ra, 34 yoshli darvozabon amsterdamliklar bilan 2026/27 yilgi mavsum uchun shaxsiy shartnoma shartlarini allaqachon kelishib olgan. Endilikda soliqlar va maoshning bir qismini «Barselona» to‘lashi masalasini hal qilish qolgan.
«Ayaks» kelishuvni avvalroq yakunlashni rejalashtirgan edi va kechikishlar sabab transfer amalga oshmay qolishidan xavotirda. Niderlandiya klubi mavsum boshlanishi va Konferensiyalar ligasi saralash bosqichi o‘yinlaridan oldin yangi darvozabonni safiga qo‘shib olmoqchi.
Shuningdek, o‘yinchi hali «Barselona»da tibbiy ko‘rikdan o‘tmagani, bu tekshiruv esa uning jarohatdan to‘liq forig‘ bo‘lganini aniqlashi lozimligi qayd etilmoqda.
