Turinning «Yuventus» klubi «Parma» hujumchisi Mateo Pellegrinoni o‘z safiga qo‘shib olish bo‘yicha dastlabki rasmiy taklifini yubordi, biroq A Seriyaning ikki klubi o‘rtasidagi ilk muzokaralar muvaffaqiyatsiz yakunlandi. Bu haqda Tuttosport nashri xabar tarqatdi.

Ma’lum qilinishicha, «turinliklar» 30 million yevrolik taklif bilan chiqishgan bo‘lib, unga ko‘ra futbolchi avvaliga ijaraga olinishi va keyinchalik muayyan shartlar bajarilganda (masalan, «Yuventus»ning keyingi mavsumda kuchli o‘nlikdan joy olishi) to‘liq sotib olinishi ko‘zda tutilgan edi. Biroq «Parma» rahbariyati ushbu shartlarga rozi bo‘lmadi. Parmaliklar futbolchini to‘liq transfer qilishni yoki ijara to‘lovi ancha yuqori bo‘lgan boshqacha ko‘rinishdagi shartnoma imzolashni afzal ko‘rishmoqda.

Shunga qaramay, ikki klub o‘rtasidagi muzokaralar to‘xtab qolgani yo‘q. Tomonlarning futbolchi borasidagi moliyaviy baholari bir-biriga yaqin bo‘lib, yaqin soatlarda yangi uchrashuvlar o‘tkazilishi kutilmoqda.

Calciomercato.com nashrining qo‘shimcha qilishicha, hujumchi Dushan Vlaxovich jamoani tark etganidan so‘ng «Yuventus» faol ravishda markaziy hujumchi qidirmoqda. Klub avvalroq «Jenoa»dan 19 yoshli Jeff Ekxatorni sotib olgan bo‘lsa-da, yangi mavsum oldidan tajribali hujum chizig‘i vakiliga ehtiyoj sezmaqda. Pellegrinoning o‘zi Turin klubiga o‘tishga xayrixoh, biroq unga Premyer-liga va La Liga jamoalaridan ham qiziqishlar mavjud.