«Tottenxem»ning ispaniyalik himoyachisi Pedro Porro klub bilan shartnomani uzaytirgani haqida o‘z fikrlari bilan o‘rtoqlashdi.
Futbolchining so‘zlariga ko‘ra, uning «shporlar» bilan kelishuvni uzaytirish qarorida rahbariyat tomonidan bildirilgan ishonch asosiy omil bo‘lgan.
«Aytganimdek, hozir men «Tottenxem»da juda baxtiyorman, chunki klub meni qo‘llab-quvvatladi. Menga yangi shartnoma taklif qilishdi, menimcha, men bunga loyiq edim», — deya Porroning so‘zlarini keltiradi Last Word On Spurs.
Avvalroq 26 yoshli himoyachiga «Barselona» va Madridning «Real» klublari qiziqish bildirayotgani haqida xabar berilgan edi.
O‘tgan mavsumda Porro barcha turnirlarda 47 ta uchrashuvda ishtirok etib, ikkita gol urdi va oltita golli uzatmani amalga oshirdi.
