«Yuventus» sport direktori Jovanni Karnevali turinliklar klubi nima uchun haligacha fransiyalik hujumchi Randal Kolo-Muanining transferi borasida «PSJ» bilan kelisha olmayotganini tushuntirib berdi. Funksionerning so‘zlariga ko‘ra, bitimdagi asosiy to‘siq moliyaviy masala bo‘lib qolmoqda. Parijliklar futbolchi uchun juda katta mablag‘ talab qilishmoqda.

«Bu transferni juda tez yopish mumkin edi — shunchaki «PSJ» shartlariga rozi bo‘lish kifoya. Biroq biz ularning moliyaviy talablarini haddan tashqari yuqori deb hisoblaymiz. Agar murosa topishning iloji bo‘lsa, muzokaralar davom etadi. Hozircha Fransiya klubi Kolo-Muani uchun 45 million yevrodan ortiq mablag‘ olmoqchi», — deya ta’kidladi Karnevali.

Eslatib o‘tamiz, avvalroq hujumchi «Yuventus» safida ijara asosida to‘p surgan. U turinliklar safida barcha musobaqalarda 22 ta o‘yin o‘tkazib, 10 ta gol urishga muvaffaq bo‘lgandi.