UEFAga a’zo bo‘lgan bir qator futbol assosiasiyalari FIFA prezidentligi uchun bo‘ladigan navbatdagi saylovda boshqa rahbar tayinlash masalasini muhokama qilmoqda. Bu haqda TalkSPORT nashri xabar berdi.

Nashrning yozishicha, AQSH terma jamoasi hujumchisi Folarin Balogunning JCH-2026 dagi diskvalifikasiyasi FIFA intizom qo‘mitasi tomonidan to‘xtatib qo‘yilgach, Yevropa davlatlarining noroziligi ortgan va ular amaldagi rahbariyatga o‘rinbosar qidirishga tushgan.

Amaldagi rahbar Janni Infantino navbatdagi saylovda ham o‘z nomzodini qo‘ymoqchi. Ammo Belgiya, Germaniya, Ispaniya, Shvesiya va Norvegiya kabi mamlakatlar federasiyalari unga qarshi boshqa nomzodlarni ko‘rib chiqmoqda. Hozircha Polshaning “Legiya” klubi xo‘jayini Dariush Mioduski hamda CONCACAF (Shimoliy Amerika futbol konfederasiyasi) prezidenti Viktor Montalyani varianti muhokama qilinmoqda.

Boshqa nomzodlar orasidan UEFA prezidenti Aleksander Cheferin bor e’tiborini Yevropa futboliga qaratmoqchi, “PSJ” klubi rahbari Nosir al-Xelayfi esa bu borada hech narsa demagan. Afrika futboli (CAF) rahbari Patris Mosepe ham kelajakda FIFA prezidenti bo‘lishni istaydi, biroq u Infantinoning yaqin do‘sti bo‘lgani sababli, amaldagi rahbarning vakolat muddati tugaydigan 2031-yilni kutishni afzal ko‘rmoqda.

Ma’lumot o‘rnida, FIFA prezidentligiga nomzodlar 18 noyabrga qadar ro‘yxatga olinishi kerak. Saylovlar ham aynan shu kuni Marokashning Rabot shahrida bo‘lib o‘tishi belgilangan.