Polshalik hujumchi Robert Levandovskining «Chikago Fayr» safidagi debyut uchrashuvi noma’lum muddatga qoldirildi.
«Chikago» matbuot xizmati xabar berishicha, bunga Kanadadagi o‘rmon yong‘inlari sababli shahardagi havoning keskin ifloslanishi asos bo‘lgan.
Polshalik futbolchi yangi jamoasi safida birinchi marta maydonga tushishi kutilgan «Vankuver Uaytkeps»ga qarshi o‘yin Toshkent vaqti bilan 17 iyul soat 05:30 ga belgilangan edi. Biroq havodagi tutun miqdori oshgani sababli shaharda ochiq havoda o‘tkazilishi rejalashtirilgan barcha ommaviy tadbirlar bekor qilindi.
O‘yinning yangi sanasi hozircha aniqlanmagan. Eslatib o‘tamiz, Levandovski «Chikago»ga «Barselona»dan erkin agent sifatida o‘tgan edi.
