Futbol bo‘yicha O‘zbekiston Superligasi ishtirokchisi “Andijon” klubi rasmiy bayonot bilan chiqib, jamoaga qo‘yilgan transfer taqiqi bekor qilinganini ma’lum qildi.

So‘nggi vaqtlarda klubning sobiq legioneri Altin Kreziu bilan bog‘liq moliyaviy muammo sababli FIFA tomonidan transfer taqiqi joriy etilgan va bu holat andijonlik muxlislar o‘rtasida xavotirlarga sabab bo‘lgan edi.

“Andijon” matbuot xizmatining xabar berishicha, klub rahbariyatining sa’y-harakatlari natijasida mazkur qarzdorlik to‘liq bartaraf etilgan. Shundan so‘ng FIFA tomonidan jamoaga nisbatan qo‘yilgan cheklovlar rasman olib tashlangan.

Ma’lumot uchun, transfer taqiqining bekor qilinishi “Andijon” klubiga yangi futbolchilarni ro‘yxatdan o‘tkazish va tarkibni kuchaytirish imkonini beradi.