Футбол бўйича Ўзбекистон Суперлигаси иштирокчиси “Андижон” клуби расмий баёнот билан чиқиб, жамоага қўйилган трансфер тақиқи бекор қилинганини маълум қилди.
Сўнгги вақтларда клубнинг собиқ легионери Алтин Крезиу билан боғлиқ молиявий муаммо сабабли ФИФА томонидан трансфер тақиқи жорий этилган ва бу ҳолат андижонлик мухлислар ўртасида хавотирларга сабаб бўлган эди.
“Андижон” матбуот хизматининг хабар беришича, клуб раҳбариятининг саъй-ҳаракатлари натижасида мазкур қарздорлик тўлиқ бартараф этилган. Шундан сўнг ФИФА томонидан жамоага нисбатан қўйилган чекловлар расман олиб ташланган.
Маълумот учун, трансфер тақиқининг бекор қилиниши “Андижон” клубига янги футболчиларни рўйхатдан ўтказиш ва таркибни кучайтириш имконини беради.
