Portugaliya terma jamoasining sobiq bosh murabbiyi Fernandu Santush «Real»ning yangi a’zosi Bernardu Silva jamoa yetakchilaridan biriga aylanishiga ishonch bildirdi.

«Uning futbolchi sifatida qanchalik iqtidorli ekanini hamma biladi. Bernardu futbolni dunyodagi juda kam sonli o‘yinchilar tushuna oladigan darajada anglaydi. Inson sifatida esa u bundan kam emas — e’tiborli, odobli va hamisha yordamga tayyor.

Ishonchim komilki, «Real» muxlislari Bernardu Silvani yaxshi ko‘rib qolishadi. U ularni ranjitmaydi va bildirilgan ishonchni oqlaydi. U ajoyib o‘yinchi va buni Madridda albatta isbotlaydi», — dedi Santush Diario AS nashriga bergan intervyusida.

So‘nggi 9 yil davomida Bernardu Silva «Manchester Siti» sharafini himoya qildi va klubni erkin agent sifatida tark etdi.